Joh 10 | PltULB | STEP | “Lazaiko aminareo, marina, dia marina tokoa, fa izay tsy miditra ny vavahady ho amin’ny valan’ondry, fa mananika lalana hafa, dia mpangalatra sy mpandroba izy.

John 10

1 “Lazaiko aminareo, marina, dia marina tokoa, fa izay tsy miditra ny vavahady ho amin’ny valan’ondry, fa mananika lalana hafa, dia mpangalatra sy mpandroba izy. 2 Fa izay miditra ny vavahady kosa no mpiandry ondry tsara.

3 Izy no vahan’ny mpiandry vavahady. Mandre ny feony ny ondry, ary izy miantso ny ondriny manokana amin’ny anarany ka mitondra azy mivoaka. 4 Rehefa namoaka ny azy rehetra izy, dia nialoha lalana azy ireo, ary manaraka azy ny ondriny, satria mahalala ny feony.

5 Ary tsy hanaraka vahiny izy ireo fa handositra azy kosa, satria tsy fantany ny feon’ny vahiny.” 6 Jesosy nilaza izany fanoharana izany tamin’izy ireo, saingy tsy azon’izy ireo akory ireo zavatra nolazainy tamin’izy ireo.

7 Dia hoy indray Jesosy tamin’izy ireo hoe: ‘’Lazaiko aminareo, marina, dia marina tokoa, fa Izaho no vavahadin’ondry. 8 Izay rehetra tonga talohako dia mpangalatra sy mpandroba, satria tsy nihaino azy ireo ny ondry.

9 Izaho no vavahady. Raha misy miditra ao amin’ny alalako, dia ho voavonjy izy; hiditra sy hivoaka izy ary hahita ny fihinanana. 10 Fa ny mpangalatra tsy avy raha tsy hangalatra sy hamono ary handrava. Fa Izaho kosa avy mba hananan’izy ireo fiainana ary hanana izany be dia be.

11 Izaho no mpiandry tsara. Ny mpiandry tsara dia manolotra ny ainy hamonjena ny ondriny. 12 Ny mpikarama dia tsy mpiandry ary tsy tompon’ny ondry. Raha nahita ambodia manatona izy dia handao ny ondry ka hitsoaka, ary ny ambodia misambotra sy mampiparitaka azy ireo. 13 Mandositra izy satria mpikarama ka tsy miraharaha ny ondry.

14 Izaho no mpiandry ondry tsara, ary fantatro ny Ahy, ary fantany Aho. 15 Ny Ray mahafantatra Ahy, ary Izaho mahafantatra ny Ray, ary Izaho manolotra ny aiko ho an’ny ondry. 16 Manana ondry hafa izay tsy amin’ity vala ity Aho. Tsy maintsy ho entiko ihany koa ireny, ary izy ireo handre ny feoko mba ho tonga andiany iray ihany sy mpiandry iray.

17 Izao no antony hitiavan’ny Ray Ahy: mahafoy manolotra ny aiko Aho mba handraisako izany indray. 18 Tsy misy manaisotra izany amiko, fa ny tenako ihany no manolotra izany. Manana fahefana hanolotra izany Aho, ary manana fahefana haka izany indray. Izany didy izany dia azoko avy tamin’ny Raiko.”

19 Nisy fizarazarana indray teo amin’ireo jiosy noho ireo teny ireo. 20 Maro tamin’izy ireo no nilaza hoe: “Manana demonia Izy ary very saina. Nahoana ianareo no mihaino Azy?” 21 Ny sasany nilaza hoe: “Tsy fitenin’ny olona misy demonia izany. Moa ny demonia afaka mampahiratra ny mason’ny jamba?”

22 Avy eo tonga ny fetin’ny fanokanana tao Jerosalema. 23 Ririnina tamin’izany, ary Jesosy nitsangana teo an-kianjan’ny tempoly teo amin’ny fialofan’i Solomona. 24 Avy eo notangoronan’ ireo Jiosy Izy ary niteny taminy hoe: ‘’Mandrapaha- rahoviana no hampisalasalanao anay? Raha Ianao no Kristy, dia hambarao miharihary aminay.”

25 Ary Jesosy namaly azy ireo hoe: ‘’Efa nanambara anareo aho, fa tsy mino ianareo. Ireo asa izay ataoko amin’ny anaran’ny Raiko, ireo no manambara ny mahakasika Ahy. 26 Kanefa ianareo tsy mino satria tsy mba ondriko.

27 Mandre ny feoko ny ondriko; fantatro izy ireo, ary manaraka Ahy. 28 Omeko azy ireo ny fiainana mandrakizay; ka tsy ho faty mandrakizay izy ireo, ary tsy hisy handrobaka azy eo am-pelantanako.

29 Ny Raiko, izay nanome ireo Ahy, dia lehibe noho ny hafa rehetra, ary tsy misy mahavita mandrobaka azy ireo eo am-pelatanan’ny Ray. 30 Izaho sy ny Ray dia iray ihany.” 31 Avy eo naka vato indray ireo Jiosy mba hitora-bato Azy.

32 Ary Jesosy namaly azy ireo hoe: ‘’Maro ny asa tsara nasehoko anareo avy tamin’ny Ray. Koa inona tamin’ireny asa ireny no hitorahanareo vato Ahy?‘’ 33 Namaly Azy ireo Jiosy hoe: “Tsy ny asa tsara no hitorahanay vato anao, fa ny fitenenan-dratsy, satria ianao, olombelona, dia manao ny tenanao ho Andriamanitra.”

34 Namaly azy ireo Jesosy hoe: “Tsy efa voasoratra ao amin’ny lalànareo ve hoe: ‘Hoy Aho hoe: “andriamanitra ianareo”’? 35 Raha niantso ireny ho andriamanitra izy, dia ho an’iza izany no niavian’ny tenin’Andriamanitra (ary ny Soratra Masina dia tsy azo foanana), 36 moa ve ilay nohamasinin’ny Ray sy nirahina ho amin’izao tontolo izao no ataonareo hoe: ‘Miteny ratsy Ianao,’ noho Izaho niteny hoe: ‘Izaho no Zanak‘Andriamanitra’?

37 Raha tsy manao ireo asan’ny Raiko Aho, dia aza mino Ahy. 38 Fa raha manao ireny Aho, na dia tsy mino Ahy aza ianareo, dia minoa ireo asa mba hahafantaranareo sy hahazoanareo fa ny Ray dia ato Amiko ary Izaho ao amin’ny Ray.” 39 Mbola nikasa ny hisambotra Azy indray izy ireo, fa nandositra Izy.

40 Dia nankany an-dafin’i Jordana indray Izy ho any amin’ilay toerana izay nanaovan’i Jaona batisa voalohany, ary nitoetra teo. 41 Maro ny olona nanatona Azy ary hoy izy ireo hoe: “Jaona tsy mba nanao famantarana, fa ny zavatra rehetra nolazain’i Jaona momba io lehilahy io dia marina.” Maro ny olona nino Azy teo.